Róðrarsamband Føroya og Trygd hava undirskrivað eina nýggja samstarvsavtalu, sum ger Trygd til høvuðsstuðul hjá føroyskum kappróðri næstu trý kappingarárini.

Avtalan fevnir um kappingarárini 2026, 2027 og 2028. Endamálið er at styrkja og menna føroyskan kappróður kring landið. Tað fevnir bæði um sjálvan ítróttin og arbeiðið, sum verður gjørt í sambandi við stevnurnar.

Sambært Róðrarsambandi Føroya gevur avtalan betri møguleikar at menna íðkarar og skapa tryggar karmar kring venjing og kapping.

– Vit eru sera fegin um, at Trygd verður okkara høvuðsstuðul, sigur Petur Hansen, formaður í Róðrarsambandinum.

Trygd letur eisini útgerð

Samstarvið snýr seg ikki bara um fíggjarligan stuðul. Trygd fer eisini at lata útgerð og lutir til rógvarar og feløg. Millum annað fáa øll 28 kappróðrarfeløgini í Føroyum bjargingarvestar.

Sambært Trygd er ætlanin eisini at styrkja trygdina á sjónum.

– Vit eru errin av at gerast høvuðsstuðul hjá føroyskum kappróðri, sum er ein týðningarmikil partur av okkara mentan og samleika, sigur Anna Mohr Holm, stjóri í Trygd.

Norðoyastevnan verður fyrsta stevnan

Samstarvsavtalan merkir eisini, at báturin við flest stigum fer at bera búmerkið hjá Trygd.

Norðoyastevnan verður fyrsta stevnan í røðini. Hon verður hildin frá 29. til 31. mai.