Avlopið eftir skatt hjá P/F Tjaldur minkaði úr 69,2 milliónum krónum í 2024 niður í 35,4 milliónir krónur í 2025.

Minkingin var 33,8 milliónir krónur, svarandi til nærum 49 prosent.

Nettosølan minkaði samstundis úr 1,59 milliardum krónum niður í 1,45 milliardir krónur. Úrslitið áðrenn skatt fall úr 85,2 milliónum niður í 54,4 milliónir krónur.

Marknaðarviðurskiftini trýstu úrslitið

Leiðslan metir, at gongdin í teimum ymisku virkisøkjunum sum heild var góð. Lægri gjaldoyrakursir og lakari marknaðarprísir høvdu tó neiliga ávirkan á úrslitið.

Rakstrarúrslitið áðrenn fíggjarpostar var 69,9 milliónir krónur. Tað var 4,8 milliónir krónur minni enn árið fyri.

P/F Tjaldur væntar eitt hóskandi avlop í 2026.

25 milliónir krónur í vinningsbýti

Við árslok átti samtakið ognir fyri 1,03 milliardir krónur. Eginpeningurin var 606,1 milliónir krónur, meðan samlaðu skyldurnar vóru 418,7 milliónir krónur.

Í miðal starvaðust 279 fólk í samtakinum í 2025. Nevndin skjýtur upp, at 25 milliónir krónur verða goldnar móðurfelagnum í vinningsbýti.

P/F Tjaldur varð stovnað í 2004 og hevur virksemi í Føroyum, Norðurlondum og Stóra Bretlandi. Samtakið ger serliga íløgur innan sjógæti, orku og veitaravinnu.

Janus Thomsen er stjóri, og Rúni M. Hansen er nevndarformaður.