Løgmaður hevur valt tey fólkini, sum skulu manna Føroya Váðaráð næstu fýra árini. Limirnir eru valdir eftir tilmælum frá Landsbanka Føroya, Búskaparráðnum og landsstýrismanninum í vinnumálum.

Breið faklig umboðan

Í ráðnum sita Malan Johansen, stjóri í Landsbanka Føroya, Torben Magnus Andersen, professari á Aarhus Universiteti, Björn Rúnar Guðmundsson, serfrøðingur hjá Hagstovu Íslands, Jógvan Thomsen, stjóri á Vinnustovninum, og Ragnfríð Nord Anthoniussen, fulltrúi í Vinnumálaráðnum. 

Til hvønn lim er eisini valdur ein varalimur.

Tilnevning sambært lóg

Sambært lógini um Landsbanka Føroya og Føroya Váðaráð skal løgmaður velja limirnar eftir tilmælum frá viðkomandi stovnum og myndugleikum. Landsbankin tilmælir tveir limir, Búskaparráðið ein lim og landsstýrismaðurin í vinnumálum tveir limir.

Váðaráðið hevur til uppgávu at fylgja við váðum í fíggjarligu skipanini og stuðla undir fíggjarligan støðufesti í Føroyum.