Føroyska manslandsliðið í fótbólti tekur í kvøld ímóti Slovakia á Tórsvølli í UEFA Nations League. Dysturin verður bríkslaður í gongd klokkan 19.45.
Í sambandi við dystin eru nøkur áhugaverd hagtøl um Føroyar og Slovakia savnað saman.
Tølini vísa millum annað, at 30 menn, sum eru føddir í Slovakia, búgva í Føroyum. Hinvegin er eingin kvinna, sum er fødd í Slovakia, skrásett sum búsitandi í Føroyum.
Handilin millum londini gongur eisini mest tann eina vegin.
Í fjør innfluttu Føroyar vørur úr Slovakia fyri nærum 50 milliónir krónur. Størsti parturin av innflutninginum var maskinur til landbúnað, sjónvørp og bind.
Hinvegin útfluttu Føroyar ongar vørur til Slovakia í fjør.
Hava ikki spælt móti hvørjum øðrum í 30 ár
Tað er eisini langt síðani, at føroyska manslandsliðið seinast møtti Slovakia.
Londini hittust tvær ferðir í HM-undankappingini í 1996. Fyrri dysturin varð spældur á Svangaskarði 31. august 1996, tá Slovakia vann 2-1. Seinni dysturin varð spældur í Slovakia 23. oktober sama ár, og tá vunnu slovakar 3-0.
Sostatt eru júst 30 ár liðin, síðani manslandsliðini bæði seinast hittust.
Føroyar hava fingið javnleik í báðum teimum fyrstu dystunum í hesi Nations League-kappingini – 1-1 móti Kasakstan á heimavølli og 1-1 móti Moldova á útivølli. Slovakia hevur hinvegin vunnið báðar sínar fyrstu dystir, 2-0 móti Moldova og 2-1 móti Kasakstan.
Í videobrotinum omanfyri ber til at síggja fleiri útvald hagtøl og samanbera Føroyar og Slovakia undan dystinum í kvøld.
