Hátíðarhaldið varð hildið í sambandi við, at Marius Jacobsen hevur røkt deknatænastuna í hálva øld. Í kirkjuni helt presturin Gerhard røðu, har hann takkaði fyri trúfasta arbeiðið gjøgnum nógv ár. Kirkjuráðið handaði eisini Mariusi eina serstaka gávu – ein grindaknív – sum eisini sipar til hansara drúgvu tíð sum grindaformaður.

Kirkjan næstan líka full sum jólaaftan

Nógv fólk vóru komin saman at heiðra Marius. Kirkjan var nærum fullsett. Ikki so løgið, tí nógv hava kent ágóðan av hansara tænastu – bæði til gudstænastur, høgtíðir, vígslur og jarðarferðir.

Eftir kirkjugongdina varð bjóðað til døgurða í bygdarhúsinum, har røður vóru hildnar, og ein sangur, yrktur av Árna Jacobsen, varð 

framførdur. Umleið 140 fólk vóru við til samkomuna.

Fleiri ættarlið í Leirvík hava hoyrt eyðkenda tónalagið hjá Mariusi, tá hann hevur biðið “Faðir vár“ í kirkju, á møtum og í sunnudagsskúla. Tað verður lýst sum tekin um langa og støðuga tænastu í andaliga arbeiðnum.

Marius Jacobsen takkaði fyri heilsanirnar og segði, at hann gav Gudi æruna fyri árini sum deknur.