Nýggja róðrarneystið hjá Klaksvíkar Róðrarfelag verður nú brúkt til nógv annað enn kappróður. Týsdagin vóru yvir 60 altjóða gestir savnaðir har, tá Klaksvíkar kommuna skipaði fyri samkomu fyri luttakarum í Northern Periphery and Arctic Programme og NORA.
Frá kappróðri til altjóða samkomur
Gestirnir vóru verkætlanarleiðarar og umboð fyri verkætlanir, sum hava fingið stuðul gjøgnum skipanirnar. Tey eru í Klaksvík hesa vikuna, har tey luttaka á fundum og skeiðum.
Róðrarneystið er sostatt vorðið eitt virkið savningarstað mitt í Klaksvík. Býráðið nýtir javnan hølini til fundir, móttøkur og almennar samkomur, eisini tá útlendskir gestir vitja býin.
Listaverk vekur ans
Neystið hevur eisini vakt ans hjá ferðafólki og áhugabólkum. Eitt eyðkenni er listaverkið hjá Edvard Fuglø, har kappróðrarbáturin Fípan Fagra er tikin sundur og hongdur upp á veggin sum listaverk.
