Danska fólkakirkjan fyrireikar nú prestar kring alt landið til eina støðu, har Danmark kann missa 10–20 hermenn um dagin í einum stórkríggi. Tað metir herprósturin Thomas H. Beck sambært TV2. Talið er tó ein meting og ikki ein almenn frágreiðing frá danska verjumálaráðnum.
Bakgrundin er økta hóttanarstøðan eftir kríggið í Ukraina og vandin fyri einum hernaðarligum samanbresti í Baltikum, har danskir hermenn eru sendir út.
Allir sóknarprestar skulu undirvísast
Frá januar skulu herprestar ferðast kring Danmark og undirvísa øllum sóknarprestum í, hvussu teir skulu handfara støður við nógvum falnum hermonnum. Teir skulu millum annað læra um hernaðarligar jarðarferðir og um at bera avvarðandi deyðsboð.
Danska verjan hevur 95 herprestar, men sambært verkætlanini megna teir ikki einsamallir uppgávuna í einum stórkríggi. Verkætlanin „Folkekirke og Forsvar“ hevur fingið 1,8 milliónir krónur í stuðli frá danska verjumálaráðnum.
Prestur ávarar móti „krígsmaskinu“
Ikki allir prestar taka undir við ætlanini. Sóknarpresturin Peter Friis í Flintholm Kirke óttast, at kirkjan verður ov tætt knýtt at hernaðarligu uppbyggingini.
– Eg haldi ikki, at kristindómurin skal spennast fyri eina krígsmaskinu, sigur hann.
Thomas H. Beck heldur hinvegin, at fyrireiking er neyðug. Undir Afganistan-krígnum vóru tapini nógv minni, men royndirnar úr krígnum í Ukraina vísa, at eitt framtíðar kríggj kann hava munandi størri mannatap við sær.
