Álvarsligir trygdarveikleikar í netútgerð fingu í farnu viku KT landsins at seta eina umfatandi trygdardagføring í verk. Tilsamans 2.674 tól á Landsneti og Skúlaneti vórðu dagførd eftir ávaring frá tøknifyritøkuni Fortinet.
Alt arbeiðið varð avgreitt eftir einari nátt, uttan at almennir stovnar og skúlar merktu nakað til tað.
Felags útgerð gjørdi munin
Sambært Gjaldstovuni var tað avgerandi, at netútgerðin á Landsneti og Skúlaneti er vorðin standardiserað.
– At vit kundu dagføra 2.674 tól eftir einari nátt, hevði ikki latið seg gjørt, um vit ikki høvdu standardiserað netútgerðina. Við fleiri framleiðarum, nógvum ymiskum modellum og verri yvirliti hevði uppgávan verið munandi truplari, sigur Birgir av Steinum, deildarstjóri fyri KT landsins.
Seinastu árini hevur KT landsins saman við veitaranum, stovnum og skúlum skift gomlu netútgerðina út við nýggja útgerð frá Fortinet.
Fortinet heldur upplýsingum aftur
Trygdardagføringarnar rætta álvarsligar og kritiskar veikleikar, sum Fortinet hevur funnið við nýggjari vitlíkistøkni.
Enn er tó ikki alment greitt, hvørjir veikleikarnir eru.
– Vit vita tí ikki enn nágreiniliga, hvørjar veikleikar dagføringarnar rætta. Fortinet hevur valt at bíða við fullu kunningini, tí upplýsingarnar kunnu hjálpa áleyparum at finna og misnýta veikleikarnar í útgerð, sum enn ikki er dagførd, sigur Birgir av Steinum.
Fortinet mælir kundum til at dagføra útgerðina skjótast gjørligt og raðfesta útgerð, sum er vend móti internetinum.
Fullu trygdarfrágreiðingarnar verða eftir ætlan almannakunngjørdar 10. november.
