Amerikanski sendiharrin í danska kongaríkinum, Kenneth A. Howery, heldur, at Føroyar hava ein sera avgerandi leiklut í trygdini í Norðuratlantshavi. Serliga strategiska staðsetingin hjá Føroyum ger oyggjarnar týðandi í eftirlitinum við russiskum kavbátum, sum hava kós suður í Atlantshavið.
Føroyar hava eina strategiska lykilstøðu
Í einari nýggjari samrøðu við Dimmalætting sigur Howery, at trygdin kring Føroyar og í Norðuratlantshavi hevur høga raðfesting hjá NATO. Hann vísir eisini á samstarvið við Vørn og nevnir møguleikan fyri, at amerikansk herskip aftur kunnu vitja í Føroyum.
– Føroyar liggja strategiskt sera væl, tá ið ræður um at hava eftirlit við russiskum kavbátum, sum hava kós longur suður út í Atlantshavið. Alt hetta hevur sera høga raðfesting í NATO, sigur Kenneth A. Howery.
Radarin á Sornfelli skal geva betri støðumynd
Sendiharrin hevur sjálvur vitjað staðið á Sornfelli. Hann heldur, at staðsetingin er serliga væl egnað til radaran, og fegnast um, at amerikanska verjufyritøkan Lockheed Martin er vald sum veitari.
Sambært Howery fer radarin at bøta um støðumyndina í økinum og vera til gagns fyri Føroyar, USA og NATO sum heild. Hann sigur samstundis, at trygdarstøðan í dag er nøktandi, men at altíð ber til at gera meira. Radarin er tí ein týðandi raðfesting hjá pørtunum.
Les alla samrøðuna við amerikanska sendiharran í nýggjastu útgávuni av Dimmalætting. Blaðið kann keypast kring alt landið, og kann eisini lesast á heimasíðuni (krevur hald).
