Apple hevur stevnt OpenAI og tveimum starvsfólkum hjá felagnum. Tøknirisin skuldsetir OpenAI fyri at hava stolið loyniligar upplýsingar um komandi vørur, framleiðsluhættir og tøkni.
Málið er lagt fyri ein føderalan dómstól í Kalifornia. Sambært Apple hevur OpenAI brúkt núverandi og fyrrverandi starvsfólk hjá Apple til at fáa fatur á loyniligum sniðtekningum og innanhýsis vitan.
Skuldsetir leiðsluna
Apple heldur, at framferðin er partur av einum mynstri, sum ovasta leiðslan hjá OpenAI hevur góðtikið. Í stevningini verða millum aðrar Tang Tan og Chang Liu nevndir. Báðir hava áður starvast hjá Apple.
Teir verða skuldsettir fyri at hava fingið fatur á vinnuloyndarmálum og eggjað øðrum starvsfólkum til at fremja líknandi lógarbrot
OpenAI vísir skuldsetingunum aftur
OpenAI vísir skuldsetingunum aftur og sigur, at felagið ongan áhuga hevur í vinnuloyndarmálum hjá øðrum fyritøkum.
Apple krevur, at OpenAI letur allar loyniligu upplýsingarnar aftur. Apple krevur eisini endurgjald ella nýtslugjald fyri upplýsingar, sum kunnu vera misnýttar.
