Arbeiðsloysið í Føroyum var 0,9 prosent í august, sum er 0,1 prosentstig lægri enn í august í fjør. Sambært Hagstovu Føroya vóru 336 fólk rakt av arbeiðsloysi.

Umroknað til fulltíðararbeiðsloysi vóru 276 arbeiðsleys. Tað eru 34 færri enn í sama mánað í fjør. 

Munurin millum kynini er týðiligur. Arbeiðsloysið hjá monnum var 1,1 prosent, meðan tað hjá kvinnum var 0,7 prosent. 211 menn og 125 kvinnur vóru rakt av arbeiðsloysi. 

Suðuroyggin hevur størsta arbeiðsloysið

Størsta arbeiðsloysið var í Suðuroy við 1,9 prosentum. Minst var arbeiðsloysið í Norðoyggjum og Sandoynni, har tað var 0,6 prosent.

39 fólk høvdu verið arbeiðsleys í meira enn eitt ár. Tað svarar til góð 12 prosent av teimum arbeiðsleysu.