Í kvøld vóru tveir teir fyrstu dystirnir í fimta umfari í Meistaradeildini. Í Klaksvík vann KÍ 6-1 ímóti B68, sum harvið legði rygg til annað stórtapið á útivølli. Tað fyrra var í triðja umfari, tá ið B68 tapti 6-0 í Gundadali ímóti B36.
Í kvøld hevði B36 vitjan av Skála, men tað eydnaðist ikki B36 at skora mál, og so endaði tað málleyst. Hetta var fyrsta stigið hjá Skála síðani liðið í heyst flutti upp í bestu deildina. Undan hesum dystinum hevði Skála fýra ferðir tapt við einum máli.
Skálamenn vístu framúr hugburð í Gundadali. Teir vóru væl skipaðir í verjupartinum, og tað kendist vera broddur í, tá ið teir royndu seg í skjótum mótálopum.
Í Klaksvík var Árni Frederiksberg heilt stóri maðurin. Hann var tvífaldur málskjútti, og hann legði upp til trý mál. Fýra minuttir undan steðginum noyddist Patrik Johannesen, sum var fyrsti KÍ málskjúttin, av vøllinum, tí hann var skaddur. Dávid Reynheim var avloysari, og fram ímóti dystarenda staðfesti hann 6-1 sigurin. Hetta var fyrsta málið hjá Dávidi, síðani hann skifti úr italskum fótbólti og til KÍ.
Jákup B. Andreasen stútaði 2-0 málið eftir horna frá Árna Frederiksberg, og Filip Brattbakk økti tíðliga í seinna hálvleiki um munin til 4-0, og eisini tá átti Árni Frederiksberg uppleggið.
Einsamalla B68 málið skoraði innskifti Loick Lespinasse. Framrættaði franski spælarin varð skiftur inn miðskeiðis í seinna hálvleiki, og eftir at hann vann bóltin av heimaverjuni, rak hann langan tein, áðrenn hann hegnisliga lyfti bóltin upp um KÍ málverjan.
Í morgin
Víkingur – AB: Rúni Gaardbo kl. 15.00
NSÍ – 07 Vestur: Jóhan Hendrik Ellefsen kl. 15.00
EB/Streymur – HB: Jákup Øssursson Mohr kl. 15.00
