Elorkutørvurin í Sandoynni kann vaksa úr umleið 1,5–2 megawattum upp í umleið 7 megawatt, tá smoltstøðin hjá Bakkafrosti í Skálavík er liðug og farin undir virksemi.

Stóra økingin ger tað neyðugt hjá SEV at styrkja elnetið. Í eystaru helvt av oynni eru 14 transformarar skiftir út, so netið kann leggjast um úr 10 kilovoltum í 20 kilovolt.

Arbeiddu um náttina

Nýggju transformararnir vórðu settir til netið mánakvøldið 20. juli og inn í týsnáttina 21. juli.

Meðan arbeitt varð, var neyðugt at slíta streymveitingina. Tí varð arbeiðið gjørt um náttina, tá avbrotið órógvaði brúkararnar minst.

Stutt fyri midnátt fóru arbeiðstoymini út til ymisku transformatorstøðirnar. Arbeiðið varð gjørt í stigum og samskipað úr eftirlitsrúminum hjá SEV á Landavegnum í Havn.

Klokkan 02.35 var arbeiðið liðugt, og streymurin var aftur í eystaru helvt av Sandoynni.

Sandur og Skopun standa næst

Fyri sjey árum síðan varð seinasta ellinjan í Sandoynni tikin niður. Tá var alt elnetið í oynni lagt í kaðal.

Nú er elnetið í eystaru helvt styrkt við nýggjum transformarum. Sambært SEV verður netið, sum veitir Sandi og Skopun streym, væntandi eisini styrkt í september. Tá er ætlanin at seta 60 kV-netið til.