Í gjárkvøldið varð ringt til løgregluna at boða frá, at eldur var í bilverkstaðnum í Grønadali í Suðuroy, tað er beint við miðnámsskúlan.

Løgreglan sigur, at sløkkilið og løgregla vóru skjót á staðið, men talan var um so stóran eld, at tað bar ikki til at sløkkja hann.

Løgreglan sigur, at eink fólk var inni. Hinvegin tey vita ikki um nakrir bilar vóru inni, men har var í hvussu so er ein stór goymsla av dekkum.

Løgreglan sigur at alt brann í grund, so har er einki eftir og í dag fara tey at kanna verkstaðið fyri at vita um greiða kann fáast á, hví eldur kom í.

Tað hjálpir væl at tey vita, hvar eldurin kyknaði, tí tað sóu tey, sum boðaðu frá.

Í hesum sambandi kann eisini nevnast, at streymslit var í Suðuroy eina lítla løtu í gjár so kannað verður eisini um tað kann hava havt nakað við eldsbrunan at gera.