Billund Lufthavn er nú mettur sum tíggjundi besti flogvøllur í heiminum. Tað skrivar tvSyd, sum vísir til eina nýggja rangering hjá týska ferðamiðlinum Travelbook.

– Hold da fast, det er fedt, sigur Dan Prangsgaard, samskiftisleiðari í Billund Lufthavn.

Stundvísi telur mest

Raðfestingin byggir fyrst og fremst á stundvísi. Komur og fráferðir sum henda rættstundis telja 60 prosent av samlaðu metingini.

Tænastustøðið telur 20 prosent, og handlar og matstovur á flogvøllinum telja tey seinastu 20 prosentini.

Eitt stórt herðaklapp

Billund Lufthavn væntar ikki, at plássið á listanum í sær sjálvum fer at føra til eina flóð av nýggjum ferðafólkum.

Men flogvøllurin sær heiðurin sum eitt stórt herðaklapp. Sambært Dan Prangsgaard arbeiðir flogvøllurin hvønn dag við at gera upplivingina betri fyri ferðafólk.

Millum nýggju tiltøkini er, at ferðafólk ikki longur skulu taka vætu og elektronikk upp úr handviðførinum í trygdareftirlitinum.