Amerikanski flogferðslumyndugleikin FAA hevur góðkent Boeing 737 MAX 7, meira enn átta ár eftir fyrstu royndarflúgvingina.
Hetta er fyrsta nýggja MAX-flogfarið, sum verður góðkent eftir tvær sera álvarsligar flogvanlukkur í 2018 og 2019. Tilsamans 346 fólk lótu lív í vanlukkunum.
Góðkenningin hevur drigið út, tí nýggj samveldilóggáva setti Boeing og amerikonsku eftirlitsmyndugleikunum strangari krøv.
– Henda týðandi góðkenningin staðfestir, at flogfarið er ment og kannað eftir strongum krøvum, sigur Stephanie Pope, stjóri í Boeing Commercial Airplanes.
441 royndarflúgvingar
Boeing hevur framt 441 royndarflúgvingar, sum tilsamans vardu 686 tímar.
737 MAX 7 er minsta flogfarið í MAX-røðini og hevur pláss fyri í mesta lagi 172 ferðafólkum. Boeing ætlaði upprunaliga at lata fyrstu flogførini í 2019.
Ætlanin varð tó útsett eftir vanlukkurnar og eina álvarsliga hending í januar 2024, tá eitt stykki av skrokkinum loysnaði á einum flogfari hjá Alaska Airlines, meðan tað var á flogi.
Fyrstu flogførini verða gjørd klár
Boeing ger nú fyrstu MAX 7-flogførini klár til Southwest Airlines. Flogfelagið væntar at taka tey í nýtslu næstu mánaðirnar.
Góðkenningin hevði eisini beinanvegin ávirkan á partabrævið hjá Boeing, sum hækkaði átta prosent.
FAA hevur samstundis loyvt Boeing at økja framleiðsluna av MAX-flogførum. Felagið miðar eftir at framleiða 52 flogfør av hesum slagnum um mánaðin.
