Tórshavnar kommuna tryggjar nú fígging til tilboð og tænastur fyri fólk við demenssjúku undir pensjónsaldri. Kommunan skal sjálv rinda umleið ein triðing av útreiðslunum.

Nýggj fígging til demensøkið

Løgtingið hevur samtykt, at kommunurnar ikki longur skulu rinda rakstrarstuðul til lærlingaundirvísing til landið. Pengarnir skulu í staðin brúkast til tænastur fyri fólk við demenssjúku undir pensjónsaldri.

Fyri Tórshavnar kommunu er talan um 1,656 milliónir krónur. Upphæddin svarar til umleið tveir triðingar av samlaða kostnaðinum.

Kommunan rindar sjálv tað, sum restar í.

Óheppið uppgávubýti rakti familjur

Tá kommunurnar yvirtóku eldraøkið frá landinum í 2015, fylgdi størsti parturin av demensøkinum við.

Men uppgávubýtið fyri fólk, sum fingu demenssjúku fyri pensjónsaldur, var óheppið. Sambært kommununi hevur hetta rakt bæði tey sjúku og avvarðandi teirra hart.

Frá 1. januar 2026 varð alt demensøkið savnað hjá kommununum.