Vælvitandi keldur siga fyri Dimmalætting, at dómararnir í Betri Deildini hava hótt við verkfalli, um niðrandi ákoyringar frá venjarum og leikarum ikki halda uppat.
Dómarnir halda, at teir hava fingið nógvar niðrandi ákoyringar oman yvir seg higartil í ár, men at bikarið fleyt yvir hjá teimum, tá venjarin hjá B36, Jákup á Borg, í samrøðu við FM1 eftir seinasta dystin móti HB tann 28. september segði, at hann var alt annað enn nøgdur við dømingina hjá Kára J. Á Høvdanum, har venjarin vildi vera við, at B36 átti minst tvey brotsspørk, ið hann helt, at Kári J. á Høvdunum hevði yvirsæð.
Hava fingið eina klagu
Hetta hevur fingið dómararnar og dómarafelagið til at senda eina klagu til Kappingarnevndina hjá FSF. Formaðurin í Kappingarnevndini, Róin Schrøter, hevur ikki hug at gera viðmerkingar til tað, at dómararnir hava hótt við verkfalli, men sigur, at:
- Eitt mál er innkomið frá dómarafelagnum um ákoyringar, ið dómararnir hava fingið gjøgnum árið, men at dómararnir døma sum nú er, sigur hann.
Formaðurin í Kappingarnevndini hjá FSF sigur, at tað er samband millum Kappingarnevndina og dómarafelagið, og at málið verður viðgjørt í komandi viku.
Formaðurin í dómarafelagnum, Petur Reinert, hevur ongar viðmerkingar til, hvørt teir hava hótt við verkfalli ella ikki, men sigur í stuttari viðmerking:
- Dómararnir hava einki ímóti ákoyringum, so leingi tær eru reelar, sigur formaðurin.
.png){kind=logo}
