Elbilar og vetnisbilar áttu at verði javnsettir við aðrar bilar í vegskattinum.

Tað er kjarnin í einum skrivligum fyrispurningi, sum Steffan Klein Poulsen, løgtingsmaður, hevur sett Akseli V. Johannesen, landsstýrismanni í fíggjarmálum. Hann spyr, um landsstýrismaðurin fer at leggja uppskot fyri Løgtingið, sum javnsetir el- og vetnisbilar við aðrar bilar í vegskattinum.

Fleiri elbilar á vegunum

Sambært tølum frá Akstovuni vóru 3.119 elbilar skrásettir í Føroyum 1. juni 2026. Tilsamans vóru 28.411 persónbilar skrásettir. Tað svarar til umleið 11 prosent av øllum persónbilum í landinum.

Rinda munandi minni

Í viðmerkingunum verður víst á, at elbilar rinda 1.500 krónur í vegskatti. Tað er umleið ein triðingur av tí, sum aðrir persónbilar rinda í miðal.

Samstundis verður ført fram, at elbilar eru munandi tyngri enn aðrir persónbilar. Sambært fyrispurninginum kann hetta hava við sær størri slit á vegakervið, sum frammanundan krevur munandi viðlíkahald.