Fyrrverandi íslendski tingmaðurin Bjarni Harðarson samanbar komandi fólkaatkvøðuna við ævintýrið um Reyðhettu og úlvin.

RÚV skrivar, at Bjarni Harðarson bar fram ta hvøssu samanberingina á einum væl vitjaðum fundi í Selfossi mikudagin. Bjarni Harðarson, sum nú er bókhandlari, vísti á upprunaliga ævintýrið, har úlvurin etur Reyðhettu.

Í mildari útgávum verður Reyðhetta bjargað livandi úr búkinum á úlvinum.

Ávarar móti falskari trygd

Boðskapurin var, at íslendingar ikki eiga at halda, at landið uttan avleiðingar kann taka seg úr ES-tilgongdini aftur.

Felagsskapurin Áfram Ísland, sum arbeiðir fyri, at Ísland skal verða verandi uttan fyri ES, skipaði fyri fundinum.

Fýra røðarar luttóku. Teir umboðaðu vinnulív, landbúnað og ráðgeving. Áhoyrararnir sluppu hvørki at seta spurningar ella taka lut í kjaki eftir framløgurnar.