ES-nevndin leggur upp til eina víðfevnda bankanýskipan, sum skal beina burtur forðingar millum bankamarknaðirnar í limalondunum. Tað skrivar EuroNews.

Endamálið er at styrkja kappingarførið hjá bankunum og fáa meiri kapital tøkan til útlán og íløgur.

Limalond kunnu missa ræði

Sambært ES-nevndini hevur ES árliga tørv á íløgum fyri 1.200 milliardir evrur, sum svarar til umleið 8.952 milliardir danskar krónur. Peningurin skal millum annað fíggja grøna tøkni, verju og vitlíki.

Ætlanin kann geva evropeiskum eftirlitsmyndugleikum størri vald á bankasamtøkum, sum virka í fleiri londum. Samstundis kunnu limalondini fáa minni ræði á kapitali, gjaldføri og samanleggingum millum bankar.

Bundin kapitalur skal loysast

Bankasamtøk skulu í dag lúka kapital- og gjaldføriskrøv bæði í móðurfelagnum og dótturfeløgunum. ES-nevndin heldur, at hetta bindur ov nógvan kapital.

Nýskipanin skal eisini samskipa innistøðutrygd, viðgerðina av bankum í kreppu og reglurnar móti peningaþvætti. Felags reglur móti peningaþvætti skulu eftir ætlan koma í gildi í juli 2027.

Lógaruppskotini verða væntandi løgd fram í fyrsta ársfjórðingi í 2027.