Í fleiri ár hevur verið tosað um at bøt um lestrarmøguleikarnar Føroyum. Og í hesum sambandi hevur ætlanin verið at byggja ein nýtt Fróðskaparsetur, ella nýggjan lestrarbýling, á Frælsinum, har Fróðskaparsetrið nú er.
Síðani er ætlanin fyrireikað og nú er komið so langt, at Bárður á Lakjuni, landsstýrismaður í mentamálum, hevur nú lagt uppskot fyri Løgtingið um at fara undir byggingina.
Eftir uppskotinum fer nýggja Fróðskaparsetrið - í mesta lagi - at kosta 541,9 milliónir. Men so kemur innbúgvið og listprýðingin afturat.
Eftir ætlan verður nýggja Fróðskaparsetrið liðugt í 2031. Tilsamans verður nýggi bygningurin 8.200 fermetrar til støddar og hann verður ein týðandi liður í arbeiðnum at savna virksemið hjá Fróðskaparsetrinum í ein samanhangandi lestrar- og granskingarbýling á Frælsinum, í Nóatúni og á Debesartrøð.
Felagsbygningurin skal verða miðdepilin og skapa karmar um eitt virkið og fjølbroytt lestrarumhvørvi. Í bygninginum verður lesisalur, bólkarúm og øðrum arbeiðs- og uppihaldsøkjum, har lesandi hava góðar møguleikar at lesa, samstarva og hugsavna seg.
Harumframt skal bygningurin hava eina felags móttøku og bókasavnstænastu, sum tænir lesandi, starvsfólkum og øðrum vitjandi.
Í bygninginum skulu vera fjølbroytt og liðilig undirvísingarhøli til allar útbúgvingar á Fróðskaparsetrinum.
Eisini skulu samkomu- og ráðstevnuhøli gerast, sum kunnu hýsa felagstiltøkum, prógvhandanum og størri ráðstevnum, eisini við altjóða luttøku. Bygningurin skal harumframt hava matstovu og kafe, og í mest møguligan mun vera opin og atkomuligur fyri almenninginum, sigur landsstýrismaðurin.
Felagsbygningurin skal eisini hýsa fyrisitingini hjá Fróðskaparsetri Føroya, harundir rektara, fyrisiting og fundar- og umsitingarhølum.