Um 350 milliónir krónur av tøku løgujáttanunum hjá landinum verða eftir ætlan ikki brúktar í 2026. Pengarnir verða í staðin fluttir fram til 2027.

Tað sæst í Búskaparfrágreiðing II hjá Fíggjarmálaráðnum.

Samlaða játtanin til løgur og løgukendar útreiðslur í 2026 er um 930 mió. kr. Tá eru játtanir á fíggjarlógini, eykajáttanir og 313 mió. kr., sum vórðu fluttar fram frá undanfarna ári, taldar við.

Mett verður, at um 585 mió. kr. verða brúktar í 2026. Um 348–350 mió. kr. verða sostatt fluttar fram til 2027.

Tað svarar til meira enn ein triðing av samlaðu tøku játtanini.

Stórar upphæddir standa eftir

Millum størstu framfluttu upphæddirnar eru 50 mió. kr. til nýggjar landsvegir, 47,8 mió. kr. til Strandfaraskip landsins, 45,4 mió. kr. til Fróðskaparsetur Føroya og 38,5 mió. kr. til útbyggingina av Landssjúkrahúsinum.

Eisini verða 29 mió. kr. fluttar fram til bústovnar og 25,6 mió. kr. til innkomuvegin í Runavík.

Nýggjar løgur koma afturat

Samstundis er løgukarmurin í fíggjarlógaruppskotinum fyri 2027 um 581 mió. kr. Haraftrat koma tær um 350 mió. kr., sum verða fluttar fram frá 2026. 

Fíggjarmálaráðið tekur tó fyrivarni og vísir á, at tað er torført at meta neyvt um løgunýtsluna fyri árið.