Føroyar verða í august 2026 vertir fyri altjóða IIFET-ráðstevnuni, sum savnar granskarar, vinnufólk, embætisfólk og politiskar avgerðartakarar úr øllum heiminum at kjakast um framtíðina hjá fiskivinnu og alivinnu.

Ráðstevnan verður hildin í Norðurlandahúsinum í Havn frá 17. til 21. august 2026 og verður fyriskipað av Fróðskaparsetri Føroya saman við altjóða felagsskapinum International Institute of Fisheries Economics and Trade (IIFET).

Sambært fyriskiparunum er talan um eitt av fremstu altjóða forumunum innan fiskivinnubúskap og handil við sjófeingi. Ráðstevnan hevur verið hildin annaðhvørt ár síðani 1982.

Norðurlendsk sjónarmið í miðdeplinum

Fyriskipararnir leggja dent á, at ráðstevnan gevur luttakarunum høvi at fáa innlit í norðurlendsk sjónarmið um havstýring, grøna umlegging og burðardyggar búskapir, sum eru knýttir at havinum.

Á skránni eru evni sum fiskivinnustýring, alivinna, matvørutrygd, altjóða handil, marknaðir, lívfrøðilig og búskaparlig modell, umframt stýring av fiskastovnum á opnum havi.

Kjarnuøki hjá Føroyum

Harumframt verða fleiri serstakar fundarrøðir um eitt nú kvotuskipanir, vistfrøðilig góðkenningar, fjarskotnar fiskiflotar, javnstøðu í sjófeingisgeiranum og nýskapan innan alivinnu.

Hans Ellefsen, varadekanur á Fróðskaparsetri Føroya, er formaður í lokala fyriskipanarbólkinum. Millum stuðlarnar eru Norðurlandaráðið, Tórshavnar kommuna og ICES.