Nú er tað greitt, at Danmark hevur fingið nýggja stjórn. Í kvøld hevur Mette Frederiksen kunnað Fríðrík kong um, at tað er eydnast henni at skipa nýggja stjórn. Javnaðarflokkurin hevur síðstu vikuna samráðst við Sosialistiska Fólkaflokkin, Moderaterne og Radikala Vinstraflokkin um nýggja samgongu, og nú eru samráðingarnar endaðar við nýggjum samgonguskjali. Talan er um minnilutastjórn, sum fær stuðul frá Eindarlistanum og Alternativinum.

Kongur er umborð á kongaskipinum Dannebrog, sum í kvøld er í Odense, har kongshjúnini í dag hava vitjað, og har tað í kvøld hevur verið móttøka umborð á Dannebrog.

Tað plagar at vera á Amalienborg, at tað verður kunnað um nýggja stjórn, men í kvøld var tað í Odense.

Eftir at hon hevði verið umborð, segði Mette Frederiksen við donsku tíðindafólkini, at í morgin verður samgonguskjalið lagt fram, og mikudagin fer nýggja stjórnin at heilsa uppá kong á Amalienborg.

Í morgin vera tað tíggju vikur síðani, at danir vóru á fólkatingsvali.