Bara eitt hálvt ár eftir, at Høgni Berg gavst sum miðla- og samskiftisfólk hjá HB, er hann aftur í felagnum. Hesa ferð verður tað sum nevndarlimur.

Høgni Berg sigur, at hann hevði tørv á einum steðgi, tá hann fór úr starvinum. Men talan var ongantíð um eitt endaligt farvæl til fótbóltin ella HB.

– Soleiðis er felagsskapurin í fótbólti. Hann dregur teg aftur, skrivar hann á LinkedIn.

HB er partur av samleikanum

Høgni Berg lýsir HB sum felagið, har hann sleit sínar barnaskógvar, og sum hevur verið ein stórur partur av lívi hansara og samleika.

Hann var tí ikki í iva, tá honum stóð í boði at gerast partur av nevndini.

– Felagsskapurin var har fyri meg, tá eg vaks upp. Nú er tíðin komin til, at eg aftur eri har fyri felagsskapin, sigur Høgni Berg.