Skills Føroyar, sum er FM fyri handverkslærlingar, verður í Klaksvík í 2027. Í tveir dagar skal Tekniski Skúli í Klaksvík hýsa kappingini, sum varpar ljós á yrkisútbúgvingar og evnini hjá føroyskum lærlingum.

Í fyrstu atløgu fara lærlingar í húsasmíði, el-fakinum, maskinfakinum og kokkayrkinum at kappast. Endamálið er at geva lærlingum ein pall, har tey kunnu vísa síni evni. Samstundis skal tiltakið geva øðrum ungum innlit í handverksligar útbúgvingar.

Vilja út á altjóða pall

Fyrireikararnir vænta, at næmingar, fyritøkur og onnur áhugað úr øllum landinum fara til Klaksvíkar.

Tiltakið er eisini partur av arbeiðinum at fáa Føroyar upp í WorldSkills-samtakið. Eydnast tað, kunnu føroyskir lærlingar í framtíðini umboða Føroyar í altjóða kappingum við ungum handverkarum úr øllum heiminum.