Sjúkrahúsverkið tekur nú nýggj stig fyri at verja sínar KT-skipanir móti vaksandi talgildum hóttanum. Nýggja avtalan við Formula skal tryggja, at møgulig álop verða uppdagað tíðliga, áðrenn tey fáa álvarsligar avleiðingar.

Formula skal veita framkomnar trygdarloysnir, sum hava eftirlit við KT-skipanunum alt samdøgrið, allar dagar í árinum.

Skipanirnar skulu savna og greina upplýsingar úr KT-skipanum og netverkum, so illgrunasamt virksemi verður uppdagað skjótt.

Endamálið er at fyribyrgja álopum og gera Sjúkrahúsverkið betur ført fyri at handfara trygdarhendingar.

Avtalan fevnir millum annað um trygdartænasturnar MDR, NDR og Next Generation-SIEM.

Sambært Formula snýr samstarvið seg ikki bara um at verja KT-skipanirnar, men eisini um at tryggja, at Sjúkrahúsverkið kann halda fram við sínum arbeiði, hóast talgildu hóttanirnar gerast alsamt meira framkomnar.

Formula fegnast um álitið og sær fram til samstarvið.