Seinastu mánaðirnar hevur Turið Finnbogadóttir Arge, forstjóri í Føroya Banka, vitjað fleiri deildir og arbeiðsøki í Føroyum og Grønlandi.

– Endamálið hevur verið einfalt: at lurta, skrivar hon á LinkedIn.

Hon hevur viljað hoyrt, hvat hevur týdning fyri starvsfólkini, hvat kundarnir eftirlýsa, hvat virkar væl, og hvat bankin kann gera betur.

– Hetta eru nakrir av teimum mest virðismiklu tímunum, eg brúki sum forstjóri, skrivar Turið Finnbogadóttir Arge.

Framtíð bankans umrødd í Klaksvík

Vitanin frá vitjanunum var ein týðandi partur av fyrireikingunum til strategisku umrøðurnar á einum nevndarseminari, sum júst hevur verið.

Seminarið varð hildið á nýopnaða KG Hotel í Klaksvík. Har umrøddu nevndin og fleiri starvsfelagar hennara framtíðina hjá bankanum.

Enn eru nakrar deildarvitjanir eftir. Tær verða gjørdar eftir summarfrítíðina.