Hagstova Føroya kannar í døgunum 15. til 20. november føroysku arbeiðsmegina. Í alt verða 1.300 fólk tilvildarliga vald at svara spurningum um sína støðu á arbeiðsmarknaðinum.
Endamálið er at fáa nýggj tøl fyri, hvussu stórur partur av fólkinum er á arbeiðsmarknaðinum, og um Føroyar framvegis hava hægsta vinnutíttleikan í Evropa.
32.757 fólk í arbeiðsmegini
Í november í fjør taldi føroyska arbeiðsmegin 32.757 fólk. Tað svaraði til 84 prosent av øllum í aldrinum 15 til 74 ár.
Hetta var hægsti vinnutíttleiki í Evropa.
Samanberingar við Ísland, Danmark og ES vísa, at føroyingar eru virknari á arbeiðsmarknaðinum í nærum øllum aldursbólkum.
Serliga er tað lutfalsliga stóra talið av kvinnum á føroyska arbeiðsmarknaðinum, sum ger munin.
1.300 fólk verða spurd
Hagstovan brúkar almennar skráir til at staðfesta, um fólk eru í arbeiði ella arbeiðsleys. Av teimum, sum eftir eru, verða 1.300 fólk tilvildarliga vald at luttaka í kanningini.
Tey, sum hava Mínboks, kunnu svara á netinum. Hagstovan ringir til teirra, sum ikki hava Mínboks, og til tey, sum ikki hava svarað.
Hagstovan ringir av telefonnummarinum 352828.
Arbeiðsmegikanningin verður gjørd á hvørjum ári eftir altjóða reglum. Tí kunnu føroysku tølini samanberast við tøl úr øðrum londum.