Eftir aðalfundin hjá Føroya Arbeiðsgevarafelag mánadagin 15. juni varð skipað fyri tiltaki um vinnuligar møguleikar í Grønlandi.

Tiltakið varð skipað sum samrøður við Jørgin Jacobsen, stjóra í Sandship, Turið F. Arge, forstjóra í Føroya Banka, og Kristian Stórhamar, eigara og verkætlanarleiðara hjá KSMS ApS.

 Tey greiddu frá sínum royndum við Grønlandi, hvussu tey meta møguleikarnar á grønlendska marknaðinum, og hvørjar niðurstøður tey tóku við sær frá ráðstevnuni Future Greenland, sum varð hildin í Nuuk síðst í mai.

Áhugin hjá føroyskum fyritøkum fyri Grønlandi er stórur. Vinnuhúsið skipar 29. september til 2. oktober fyri handilsferð til Grønlands, og higartil hava 100 fólk úr meira enn 50 føroyskum fyritøkum meldað seg til.