EcoFar leitar nú eftir fólki kring landið, sum hava lagt broytingar til merkis í føroyskum firðum, sundum, víkum ella vágum. Endamálið er at savna lokala vistvitan, tí vitanin um, hvussu firðirnir vóru fyrr, er avmarkað.

Spurnablaðið tekur umleið 10–20 minuttir at svara. Fólk verða biðin um at taka støði í einum ávísum staði, har tey eru uppvaksin, búgva, hava arbeitt ella hava serligt tilknýti. Hevur onkur vitan um fleiri firðir, ber til at svara kanningini fleiri ferðir.

Skal styrkja framtíðar umsiting

EcoFar er ein tvørvísindalig verkætlan við stuðli frá Granskingarráðnum. Umhvørvisstovan, Fróðskaparsetur Føroya, Havstovan, Firum og Tjóðsavnið samstarva um verkætlanina.

Seinni verða eisini samrøður gjørdar við fólk, sum hava serliga vitan um føroyskar firðir og broytingarnar í teimum. Vitanin skal geva eina betri fatan av broytingunum og kann brúkast í framtíðar yvirvøku og umsiting av føroyskum firðum.

Til ber at svara kanningini her.