Eyðun Klakstein landsliðsvenjari heldur, at tað er væl og virðiliga at liva við, at Georgia verður mótstøðuliðið, tá ið Føroyar í mars fara at spæla um pláss í B deildini í UEFA Nations League:
– Tað góða við, at lutakastið hevur verið, er, at nú vita vit, hvørjum vit skulu spæla ímóti og kunnu fyrireika okkum til tað. Georgia hevur eitt gott landslið, sum er styrkismett eini 50 pláss omanfyri okkum á FIFA-listanum, men tað eru júst tey liðini, sum vit skulu yvirhála, um vit vilja spæla í hægri deild í Nations League ella vilja til eitt endaspæl.
Fyrri dysturin millum Føroyar og Georgia verður páskaaftan, leygardagin 27. mars klokkan 14 á Tórsvølli.
Útidysturin verður týsdagin 30. mars klokkan 17.
Georgia er nummar 74 á FIFA styrkislistanum, og Føroyar eru nummar 123.
– Hetta verður fyrstu ferð, at Føroyar skulu spæla uppflytingardystir til Deild B í Nations League, og vit síggja fyrst og fremst hesar dystir sum ein stóran møguleika og eina góða avbjóðing. Vit royna støðugt at náa nýggjum málum við landsliðnum, og í mars fáa vit ein gyltan møguleika til at koma eitt stig longur á leiðini. Vit fara at gera alt, sum vit kunnu og megna, fyri, at tað skal lukkast, og vit hava sjálvandi ein kjans at vinna á Georgia samanlagt, sigur Eyðun Klakstein landsliðsvenjari.
Seinast Føroyar møttu Georgia var í venjingardysti á Boris Paichadze Dinamo Arena í juni í fjør. Tá vann Georgia 1-0.