Gleðin eftir sigurin í HM í fótbólti var brádliga vend til sorg í einum býi í Salamanca-landspartinum.

Hetta hendi tá ein 13 ára gamal drongur doyði, og trý onnur fólk vórðu álvarsliga løstað, eftir at ein søguligur brunnur rapaði saman í býnum Ciudad Rodrigo.

Vanlukkan hendi stutt eftir midnátt við Glorieta del Árbol Gordo, eitt kent savningarstað í Ciudad Rodrigo, har hundraðtals fjepparar vóru savnaðir fyri at hátíðarhalda HM-sigurin.

Sambært eygnavitnum høvdu nógv fólk klintra upp á steinbrunnin undir fagnaðinum, tá partur av brunninum brádliga rapaði saman og gróv fleiri undir grótinum.

Løgregla, Guardia Civil, sløkkilið og sjúkrabilar vóru skjót á staðið og fóru undir bjargingararbeiðið fyri at fáa fólk leys úr grótinum.

13 ára gamli drongurin var tikin undan grótinum og fluttur á heilsumiðstøð, har hann seinni doyði av løstunum.

Trý onnur fólk vórðu álvarsliga løstað og fingu viðgerð á staðnum og á sjúkrahúsi. Enn eru eingi nærri boð givin um heilsustøðu teirra.

Býráðið í Ciudad Rodrigo hevur lýst tríggjar dagar við almennari sorg. Fløggini hanga í hálvari stong, og kommunan hevur sent samkenslukvøður til familjuna hjá dronginum.

Samstundis eru kreppuhjálpartænastur settar í verk fyri at stuðla teimum, sum eru rakt av vanlukkuni.

Orsøkin til, at brunnurin rapaði saman, verður nú kannað. Fyribils bendir nógv á, at ov nógv fólk stóðu uppi á brunninum undir fagnaðinum, og at tyngdin hevði við sær, at bygningurin gav eftir.

Vanlukkan hevur lagt eina tunga sorg yvir HM-fagnaðin í Spania, har gleðin um heimsmeistaraheitið nú er blandað við djúpari sorg eftir syrgiligu hendingina.