Havstovan hevur funnið eitt samband, sum kann geva fiskivinnuni og ráðgevingini eitt týdningarmikið amboð í framtíðini. Úrslit frá verkætlanini Blue Ocean vísa, at styrkin í subpolara meldrinum hevur tætt samband við tilgongdina av svartkjafti.

Sambandið er serligt, tí at ávirkanin frá meldrinum brúkar umleið eitt ár at ferðast úr Labradorhavinum til økið vestan fyri Bretsku oyggjarnar, har svartkjafturin gýtir. Tað gevur granskarum møguleika at fáa ábendingar um komandi gýtingarumhvørvið longu eitt ár frammanundan.

Kann minka um óvissuna

Í dag verður eitt miðaltal brúkt fyri tilgongdina, tá ið ICES ger stovnsmetingar. Sambært Havstovuni ger hetta framskrivingarnar meira óvissar. Um umhvørvisgrundað vísitøl kunnu nýtast í staðin, kann tað geva neyvari metingar av einum av teimum mest umskiftiligu fiskastovnunum í Norðuratlantshavi.

Havstovan arbeiðir nú saman við arbeiðsbólki hjá ICES fyri at gagnnýta úrslitini frá Blue Ocean í framtíðar umsitingini av svartkjaftastovninum.