Í 60 minuttir tók Gunnvá Zachariassen næmingarnar við aftur til eina av teimum mest syrgiligu hendingunum í søguni hjá Hesti.

Miðnám á Kambsdali upplýsir, at leikurin Upphav snýr seg um vanlukkuna 1. apríl 1919, tá 11 menn úr Hesti sjólótust. Søgan verður lýst við eygunum hjá seks ára gomlu Óluvu, sum misti pápa sín henda dagin. 

Leikfelagið TVAZZ og Leikhús SKIFT hava framleitt leikin, sum Gunnvá Zachariassen og Marita S. Dalsgaard hava skrivað. 

Havið er høvuðsevnið

Framførslan var fyrst og fremst ætlað næmingum í 2. flokki, sum fyrireika seg til tvørfakligu breytauppgávuna. Í ár er yvirskipaða evnið Havið, og skúlin skipar tí fyri tiltøkum, sum lýsa evnið úr ymiskum sjónarhornum. 

Eftir framførsluna kundu næmingarnir seta Gunnvá Zachariassen og Onnu Katrinu Egilstrøð spurningar um leikin, framleiðsluna, havið sum evni og leiklist sum heild.