Í Eysturoynni, eins og í restini av landinum, eru fleiri vegir, ið treingja til at verða umvældir og asfalteraðir.

Tað staðfestir Jacob Vestergaard, landsstýrismaður í samferðlumálum.

Magni Højgaard, løgtingsmaður fyri Sambandsflokkin, hevur spurt landsstýrismannin í samferðslumálum um um landsvegirnar í Eysturoy.

Landsstýrismaurin staðfestir, enn eina ferð, at játtanin til at halda vegakervið hevur ikki verið nøktandi í nógv ár, og eftirsleipið er vaksið støðugt.

Landsvegakervið er 480 kilometrar. Hesi seinastu árini hevur játtanin til at asfaltera, verið einar 12 milliónir um árið og tað røkkur til at asfaltera einar seks kilometrar um árið.

Landsverk sigur, at skal landsvegakervið haldast á einum nøktandi støði, verður neyðugt at játta umleið 60 milliónir um árið og hetta svarar til at asfaltera einar 30 kilometrar av landsvegi um árið.

Í fjør vórðu vegirnir millum Fjarða, og Elduvíkarvegurin, asfalteraðir. Í 2023 varð vegurin ímillum Gøtu og Kambsdal, asfalteraður og í ár er ætlanin at asfaltera vegin á Hellunum.

Hinvegin leggur Jacob Vestergaard afturat, at harafturat er ein serlig játtan til at bøta um ferðsluviðurskiftini við Gøtugjógv.

Samstundis er peningur játtaður til at fyrireika Gøtudalstunnilin. Brúgvin um Fjarðará verður gjørd av nýggjum, og brúgvin um Streymin verður høvuðsumvæld. Raðfestingin fyri næsta er ikki liðug, men ætlanin er at halda fram við at asfaltera vegastrekkið ímillum Gøtu og Runavík.

Har er nógv ferðsla, men nógvastaðni er hann í ringum standi, sigur Jacob Vestergaard.

Vegirnir á Skála hava eisini tørv á umvælingum, og vónandi fer at bera til at asfaltera teir í næstu framtíð, leggur hann afturat.