Ongi úrslit

Húsasøla í Føroyum: Vil steðga kappbjóðing, sum trýstir húsaprísirnar upp

Ung og fyrstuferðkeyparar kunnu verða trýst út av bústaðarmarknaðinum, tá fleiri keyparar bjóða upp ímóti hvørjum øðrum. Nú verður kravt politiskt svar.

© Kortal.
Hørð kappbjóðing um hús kann seta ung og fyrstuferðkeyparar undir stórt fíggjarligt trýst. Nú verður spurningurin um strangari reglur fyri húsasølu reistur á Løgtingi.
Edmund Jacobsen
1 tími síðan

Súsanna Bertholdsen, løgtingskvinna, vil hava landsstýrið at taka støðu til, um nýggjar reglur skulu setast í verk fyri at avmarka kappbjóðing í sambandi við húsasølu í Føroyum.

Í skrivligum fyrispurningi til Jacob Vestergaard, landsstýrismann í vinnumálum, spyr hon, um galdandi reglur og mannagongdir tryggja húsakeyparum nóg góðar og tryggar umstøður.

Óttast, at ung verða trýst út

Sambært Súsannu Bertholdsen kann tað trýsta húsaprísirnar upp, tá fleiri áhugaðir keyparar bjóða upp ímóti hvørjum øðrum í fleiri umførum.

Keyparar kunnu kenna seg noyddar at bjóða meira, enn fíggjarliga ráðiligt er. Hetta kann serliga raka ung og fyrstuferðkeyparar, sum frammanundan hava trupult við at fáa fígging og uppsparing at røkka til húsakeyp.

Hon vísir eisini á, at fólk, sum leita eftir einum heimi, kunnu koma í kappbjóðing við keyparar, sum hava betri fíggjarligar umstøður og ætla at brúka húsini sum frítíðarhús.

Vil kanna danskar reglur

Súsanna Bertholdsen spyr, um landsstýrismaðurin er sinnaður at kanna møguleikan fyri at seta reglur í verk eftir danskari fyrimynd.

Í Danmark hava ognarmeklarar ikki loyvi at upplýsa áhugaðum keyparum, hvussu nógv onnur hava boðið. Verða afturlatin boð brúkt, skulu tey haldast loynilig til eina ásetta freist, og allir áhugaðir keyparar skulu hava somu fortreytir at bjóða.

Hon minnir samstundis á, at táverandi landsstýrismaðurin í vinnumálum á heysti 2024 boðaði frá, at lóggávan á økinum skuldi eftirmetast.

Nú vil hon hava greiðu á, um landsstýrið ætlar at fylgja málinum upp.

Mest lisið hesa vikuna

Nøkur orð um skyldmannin Allan Enghamar

19 tímar síðan

Løgreglan lukkaði eitt skeinkistað í Havn í nátt og koyrdu øll á dyr

14 tímar síðan

Fjúrtan heilsuhjálparar afturat klaktir á Heilsuskúlanum í Suðuroy

12. november kl. 16:10

Par kom til ilnar á alfaravegi

Í gjár kl. 09:08

Soleiðis fáa tey nógv betri kjøt úr hjallinum

10 tímar síðan

Hon var til reiðar at taka sæti á tingi fyri at fella uppskot um fosturtøku

10. november kl. 17:23