Í kvøld vóru tveir teir fyrstu dystirnir í 23. umfari, og í morgin vera tríggir teir síðstu dystirnir undan landsliðssteðginum. 24. umfar verður 20. og 11. oktober.

Í Gundadali vann NSÍ torføra útidystin ímóti B36 2-1. Úrslitið kann bera við sær, at B36 av álvara fer at missa í kappingini um europeisku atgongumerkini. Tað valdast um, hvussu tað fer at hilnast hjá kappingarneytunum um europeisku plássini í morgin. HB fær í morgin vitjan av AB, og steypavinnararnir í Víkingi fara í Sarpugerði at spæla ímóti 07 Vestur.

Í Klaksvík var KÍ favorittur ímóti Skála, og har endaði tað 2-2. Hetta var onnur ferðin í ár, at Skála vann stig í Klaksvík. 3. mai, á krossmessu, endaði tað við málleysum javnleiki, tá ið skálamenn vóru í Klaksvík.

Tølini siga, at heimavøllurin ikki er tann skansin hjá KÍ, sum hann hevur verið fleiri tey seinastu árini. Í seks teimum seinastu heimadystunum hevur KÍ vunnið átta stig.

Úrslitini í kvøld bera við sær, at NSÍ, nú tað eru fýra umfør eftir av hesum kappingarárinum, hevur 48 stig og er trý stig frammanfyri KÍ, sum hevur 45 stig. HB er á triðja við 38 stigum. Í fyrsta umfarinum eftir landsliðssteðgin fara HB og KÍ at spæla í Gundadali.

Skráin hjá NSÍ í fýra teimum síðstu umførunum sær á pappírinum betri út, enn hon sær út hjá KÍ.

NSÍ: Skála ÍF (ú), 97 Vestur (h), HB (h), B68 (ú)

KÍ: HB (ú), B68 (h), B36 (ú), Víkingur (h)

Leygardagin 19. september

Víkingur – 07 Vestur: Dagfinn Forná kl. 15.30

B68 – EB/Streymur: Jóhan Hendrik Ellefsen kl. 15.30

HB – AB: Áki Leitisstein Hansen kl. 15.30