Altjóða havrannsóknarstovnurin ICES mælir til, at eingin longa verður fiskað undir Føroyum í 2027. Tað er fjórða árið á rað, at sama tilmæli verður givið.
Orsøkin er lítil tilgongd seinastu árini. Samstundis eru forsagnirnar óvissar, og gýtingarstovnurin verður mettur at sveiggja um niðasta vandamarkið, sum er 9.340 tons.
Havstovan vísir á, at veiðan undir Føroyum hevur verið um miðal og oman fyri miðal seinastu trý árini.
Gulllaksur kann økjast
Hinvegin mælir ICES til, at veiðan eftir gulllaksi í føroyskum sjógvi og vestan fyri Skotland kann vera í mesta lagi 22.865 tons í 2027. Tað er 24 prosent meira enn tilmælið fyri 2026.
Føroyar áseta sær vanliga tveir triðingar av tilmældu veiðuni, tí eingin millumlandaavtala er um kvotubýtið av gulllaksi í økinum.
Fyri aðrar stovnar mælir ICES til, at veiðan eftir blálongu minkar 41 prosent. Tilmælið fyri svartkalva er nærum óbroytt, meðan tilmælið fyri stóra kongafisk hækkar 5 prosent.
