Ingrid Elisabeth Viðoy av Tvøroyri vísti í fjør, at eisini børn kunnu gera stóran mun fyri onnur. Við at selja heimagjørd armbond og hálsbond savnaði hon 2.100 krónur til átakið Í Menniskjum Góður Tokki.
Ingrid Elisabeth ynskti, at øll børn skuldu hava tak yvir høvdið, mat á borðið og møguleika at halda jól.
Tað skrivar Barnabati í einari dagføring á Facebook.
Strævið, men vert tað
Fyri Ingrid Elisabeth snúði arbeiðið seg um at hjálpa børnum, sum ikki hava somu møguleikar sum onnur.
Hon gjørdi litrík armbond og hálsbond úr perlum og seldi tey fyri at savna pengar inn til góða endamálið.
– Hetta var eitt sindur strævið, men ordiliga deiligt, tí eg visti, at onkur fór at verða glaður fyri tað, segði Ingrid Elisabeth.
Barnabati varpar ljós á átakið
Barnabati hevur nú varpað ljós á átakið hjá Ingrid Elisabeth og lýsir tað sum eina hjartanemandi søgu um umsorgan, næstrakærleika og viljan at gera mun.
Sambært Barnabata vísir søgan um gentuna av Tvøroyri, at tú ikki ert ov lítil til at gera stóran mun.
