Útlendingastovan hevur steðgað afturvendandi hugnakvøldunum fyri ukrainsk flóttafólk. Avgerðin varð tikin, eftir at tørvurin og eftirspurningurin minkaðu, og markið fyri 250 uppihaldsloyvum var rokkið.
Hugnakvøldini byrjaðu í januar 2023. Starvsfólk á Útlendingastovuni høvdu tá lagt til merkis, at fleiri ukrainar stríddust við einsemi, ótryggleika, stúran og vantandi sosialt netverk.
Tiltakið skuldi vera eitt óformligt frírúm og ein brúgv inn í føroyska samfelagið. Hugnakvøldini vóru eina ferð um vikuna á Føroya Fólkaháskúla í Tórshavn.
Fastir karmar skaptu tryggleika
Eftirmetingin vísti, at fastur dagur, føst tíð, kent stað og kend andlit høvdu stóran týdning. Tiltakið var ókeypis, og tað var lætt at møta upp.
Á skránni vóru millum annað borðspøl, skapandi virksemi, rørsla, lektiuhjálp og kunning um føroyska samfelagið. Eisini varð skipað fyri útferðum, hátíðarhaldum, føroyskum dansi og felags máltíðum við føroyskum og ukrainskum mati.
Myndugleikar, stovnar og felagsskapir vitjaðu eisini hugnakvøldini og veittu praktiska kunning og vegleiðing.
Náddi ikki øllum
Royndirnar vístu eisini avmarkingar. Fólk, sum búðu uttan fyri Havnina, høvdu verri møguleika at luttaka, og fáir menn komu til vanligu hugnakvøldini.
Við tíðini vóru tað serliga nýkomnir ukrainar, sum nýttu tilboðið. Tá ið luttakararnir fingu arbeiði, netverk, frítíðarítriv og fastari gerandisdag, minkaði tørvurin.
Útlendingastovan staðfestir, at hugnakvøld ikki kunnu standa einsamøll í integratiónsarbeiðinum. Men eitt einfalt tiltak við avmarkaðum útreiðslum kann styrkja trivnað, tryggleika og felagsskap, júst tá ið nýkomin hava mest brúk fyri tí.
