Norrøna felagið skrivar í tíðindaskrivi, at tey júst hava fingið at vita, at Jákup í Skemmuni hevur fingið "Letterstedtska föreningens nordiska översättarpris"

Tey ynskja honum hjartaliga tillukku við prísinum.

Jákup í Skemmuni Føroyar, fær norðurlendska umsetaraprísin hjá Letterstedtska felagnum úr Nordisku miðlunum fyri 2026. 

Prísurin er ein av teimum størstu umsetaraprísunum í Norðurlondum við eini prísupphædd á 100.000 SEK.

Letterstedtska felagið er eitt felag fyri norðurlendskt samstarv í samtíðini, stovnað í 1875. Felagið er helst elsta felagið í Norðurlondum fyri norðurlendskt samstarv av sínum slagi.

Við prísinum vil Letterstedtska felagið varpa ljós á týðandi avrik innan umsetingarkunst, sum eru av stórum týdningi fyri mentanarligt samskifti millum fólk í Norðurlondum.

Grundgevingin fyri prísinum:

Jákup í Skemmuni verður heiðraður fyri sítt langvarandi arbeiði, við at umseta norðurlendskar bókmentir til føroyskt. Við sínum umsetaravirki ríkar hann føroyska mentan við bókmentaligum røddum úr øllum Norðurlondum.

Prísurin er ein fín viðurkenning, sum eg eri sera takksamur fyri. Tað er ein váttan um, at onnur kunnu hava gleði av mínum arbeiði, og at eg í mínum yrki eri ein partur av útbreiðsluni av norðurlendskum bókmentum, sigur Jákup í Skemmuni sjálvur.

Um prísin:

Letterstedtska týðaraprísurin er ein heiðursløn fyri týðing millum norðurlendsku málini av bókmentaligum ella essayistiskum verkum, ella fyri arbeiði hjá einum týðara sum heild. Prísurin er komin til við eini gávu til Letterstedtska felagið frá fyrrverandi universitetslektaranum í týskum við Stockholms universiteti, Lars-Olof Nyhlén, og hansara avlívdu maka Marthe Urzander úr Hässelby. Prísurin hevur verið latin hvørt ár síðan 2012 til týðarar kring alt Norðurlond.