Karoline Leavitt fer úr starvinum sum talskvinna fyri Hvítu Húsini við endan av august. Tað upplýsir amerikanski forsetin, Donald Trump, mikudagin á sosiala miðlinum Truth Social.
Sambært Trump hevur Leavitt valt at siga starvið frá sær fyri at fáa meira tíð saman við sínum smáu børnum og familju. Forsetin sigur samstundis, at hann skilir og virðir avgerð hennara.
Leavitt hevur verið talskvinna hjá Trump síðani 20. januar 2025 og hevur sostatt verið eitt av fremstu andlitunum hjá forsetanum mótvegis miðlunum gjøgnum alla hansara seinnu forsetatíð.
Hon var bert 27 ára gomul, tá hon tók við starvinum, og gjørdist harvið yngsti persónurin nakrantíð í hesum starvi.
Hóast Leavitt fer úr sínum almenna starvi í Hvítu Húsunum, bendir Trump á, at hon ikki fer heilt burtur úr politikki.
Trump hevur sambært Reuters sagt, at hon framvegis verður millum hansara týdningarmestu uttanhýsis ráðgevarar.
Hon væntast eisini at halda fram við einum týðandi leikluti í Republikanska flokkinum fram móti miðskeiðisvalinum í november.
Fráferðin kemur eftir, at Leavitt fyrr í ár var í barnsburðarfarloyvi frá apríl til juli. Hon kom aftur til arbeiðis í summar, men hevur nú valt at gevast í sínum dagliga starvi sum ovasta talskvinna hjá amerikonsku stjórnini.
Leavitt hevur verið ein sjónlig og stundum hvassorðað verjari av Trump-stjórnini á teimum dagligu tíðindafundunum í Hvítu Húsunum.
Hon arbeiddi longu undir Trump í hansara fyrra forsetaskeiði sum varatalskvinna og gjørdist seinni ein týðandi partur av valstríðnum hjá Trump í 2024.
Eftir valsigurin í 2024 útnevndi Trump hana í november sama ár til komandi talskvinnu sína.
Fráferð hennara merkir, at Trump-stjórnin nú skal finna eitt nýtt andlit til eitt av teimum mest sjónligu samskiftisstarvunum í Hvítu Húsunum.
Enn er eingin nýggjur talsmaður ella talskvinna almannakunngjørd. Leavitt heldur fram í starvinum fram til endan av august.
