Økið á Lygnesi verður nú boðið út av nýggjum. Samstundis er ætlanin at broyta byggisamtyktina, so møguleiki verður fyri fleiri sjálvstøðugum bústaðareindum á økinum.

Fleiri royndir bóru ikki á mál

Økið varð fyrstu ferð boðið út í 2021 til raðhúsa- og íbúðarbygging. Samráðingarnar bóru ikki á mál, og tá økið varð boðið út aftur í 2022, kom einki tilboð.

Seinni varð roynt at leggja ætlanina um til sethúsabygging, men kostnaðurin á grundstykkjunum gjørdist ov høgur. Í 2025 kom eitt tilboð, men tað varð tikið aftur, tí mett varð, at málsviðgerðin fór at taka ov langa tíð.

Freistin verður stytt

Ætlanin er at broyta byggisamtyktina úr A1 í A4. Tað gevur møguleika fyri sethúsakendari bygging við fleiri sjálvstøðugum bústaðareindum. Innlatingarfreistin verður stytt niður í 2–4 vikur.

Tórshavnar býráð samtykti málið 17. september.