Norskur makrelútflutningur fór í mai niður á lægsta støði í 13 ár. 

Útflutt vórðu einans 4.306 tons, sum eru 25 prosent minni enn sama mánað í fjør. Kortini vaks útflutningsvirðið við 12 prosentum til 231 milliónir norskar krónur - svarandi til umleið 145 milliónir danskar krónur.

Minni makrelur á marknaðinum

Sambært Norges Sjømatråd skulu vit heilt aftur til 2013 fyri at finna ein mai mánað við lægri útflutningsnøgd. Norges Sjømatråd heldur, at gongdin vísir vaksandi trýst á makrelveitingarnar, hóast marknaðirnir framvegis keypa nógv.

Jan Eirik Johnsen, sum hevur ábyrgd av uppisjóvarfiski hjá Norges Sjømatråd, sigur, at útflutningurin helt fram at minka í mai. Hann vísir eisini á, at styrkta norska krónan hevur gjørt makrelin dýrari hjá útlendskum keyparum.

USA gongur móti rákinum

Meðan samlaði útflutningurin fellur, so er áhugin í USA vaksandi. USA var størsti marknaðurin fyri frystan heilan makrel í mai og er higartil í ár næststørsti marknaðurin fyri norskan makrel aftan á Suðurkorea.

Orsøkin er sambært Norges Sjømatråd, at amerikanski marknaðurin eftirspyr størri makrel, sum nú er meira tøkur.