Dimmalætting kann nú vátta, at málið um løgreglumannin, sum hevði misnýtt embætið til at koma í samband við ungar kvinnur, er endað á borðinum hjá Den Uafhængige Politiklagemyndighed.

Í blaðnum hesa vikuna ger Michael Boolsen, fúti, greitt, at hann fær ikki sagt nógv um málið, og at hann fær heldur ikki sagt, um málið er farið víðari til Den Uafhængige Politiklagemyndighed.

Men gjáramorgunin fekk Dimmalætting eina uppringing frá Den Uafhængige Politiklagemyndighed, sum fregnaðist eftir at vita, um Dimmalætting hevði fingið nakrar áheitanir frá fólki, sum løgreglumaðurin hevði sett seg í samband við.

Dimmalætting hevur sjálvandi ikki upplýst keldurnar fyri Den Uafhængige Politiklagemyndighed, ella nøkrum øðrum, men staðfestast kann, at málið liggur á einum skriviborði hjá danska løgregluklagumyndugleikanum.

Sambært heimasíðuni hjá Den Uafhængige Politiklagemyndighed skulu avgerðir í klagumálum takast innan rímiliga tíð.

Er eingin avgerð tikin innan seks mánaðir, hava klagari og klagaða løgreglufólki rætt til at fáa at vita, hvar málið liggur, og nær avgerð er væntað.

Er framvegis eingin avgerð tikin innan eitt ár, skal ein skrivlig frásøgn sendast fráboðara og øðrum íblandaðum pørtum.