Klokkan tvey í nátt varð ringt til løgregluna at siga frá, at eldur var í einum skúri, ella garasju, á Gomlurætt. Løgreglan sigur, at skúrurin stóð í ljósum loga og lotið lá inn ímóti Sandoyartunlinum og tí varð hann stongdur.

Klokkan 4.30, ella hálvan triðja tíma seinni, hevði sløkkiliðið fingið tamarhald á støðuni, men enn var so nógvur roykur, at tunnilin læt ikki upp aftur fyrr enn klokkan fimm og sostatt var hann stongdur í tríggjar tímar.

Men løgreglan sigur, at hesa tíðina er lítil ferðsla, so tað gjørdi ikki so illa fortreð fyri ferðsluna.

Sløkkiliðið er enn til staðar at sløkkja tað seinasta og at syrgja fyri, at eldurin ikki kyknar aftur. Løgreglan sigur, at nú fara tey at kanna skúrin fyri at vita um tey finna orsøkina til eldin.