Rúsevnismisnýtsla er ein ov álvarsligur trupulleiki til at gerast eitt stríðsmál millum samgongu og andstøðu. Tað staðfestir Beinir Johannesen, løgmaður, eftir sendingina Leivur vil liva í Kringvarpinum.

Vil hava politiska semju

Í einum uppslagi á Facebook takkar løgmaður Leivi fyri at siga sína søgu alment.

– Tú ert tann, sum tú sjálvur vildi síggja í sjónvarpinum sum yngri, skrivar hann.

Sambært løgmanni vísir sendingin, hvussu samansettur trupulleikin við rúsevnismisnýtslu er.

– Tað er eingin einføld loysn at basa tí, staðfestir hann.

Fyribyrging skal raðfestast

Løgmaður vísir á, at fleiri átøk eru raðfest á fíggjarlógini, men at hetta bert er byrjanin.

Hann vil hava fleiri átøk, serliga á fyribyrgjandi økinum, og sigur seg merkja politiskan vilja millum allar flokkar.

– Hetta er eitt samfelagsmál, skrivar Beinir Johannesen.

Hann undirstrikar, at bæði politiska skipanin og alt samfelagið mugu standa saman um at taka trupulleikan í álvara.