Føroyska flaggið, Merkið, skal framyvir vera á stong hvønn dag uttan fyri Hvidovre Ráðhús. Tað upplýsir borgarstjórin í Hvidovre, Anders Wolf, í einum uppslagi á sosialum miðlum.

-Í dag drógu vit Merkið á stong uttan fyri Hvidovre Ráðhús. Her skal tað veittra hvønn dag saman við Dannebrog, Erfalasorput og ukrainska flagginum, skrivar borgarstjórin. [Ukrainska flaggið hevur ikki nakað navn,ritsj.]

Útmeldingin kemur í kjalarvørrinum av, at Hvidovre Kommuna hevur samtykt nýggjar reglur fyri flagging við ráðhúsið. Sambært kommununi verður framyvir flaggað hvønn dag við Dannebrog, Merkinum, grønlendska flagginum og ukrainska flagginum.

Avgerðin er tikin fyri at varpa ljós á tilknýtið hjá kommununi til ríkisfelagsskapin og samstundis vísa samkenslu og stuðul til Ukraina. Borgarstjórin sigur, at flaggingin skal síggjast sum eitt tekin um felagsskap og samhaldsfesti.

Dagliga flaggingin við Merkinum er sjáldsom í donskum kommunum og merkir, at Hvidovre verður ein av fáu kommununum í Danmark, har føroyska flaggið er fastur partur av dagligu flaggingini við ráðhúsið.